आस्वला–मेंढा तलाव साहित्य चोरी प्रकरणात गंभीर संशय, तपास गुंडाळण्याचा प्रयत्न तर नाही ना?
चंद्रपुर महाराष्ट्र
रिपोर्टर:- रमाकांत यादव रिड पब्लिक न्यूज़ भारत
दिनांक:-१० फरवरी २०२६
सविस्तर बातमी:-सावली तालुक्यातील गोसिखुर्ध–आस्वला–मेंढा परिसरात सुरू असलेल्या तलाव व नहर बांधकाम साहित्य चोरी प्रकरणाने आता वेगळेच वळण घेतले आहे. प्रत्यक्ष घटनेची माहिती, स्थानिक सूत्रांचे दावे आणि पोलिसांकडून अधिकृतपणे दिलेली माहिती यामध्ये मोठ्या प्रमाणावर तफावत आढळून येत असल्याने या संपूर्ण प्रकरणात तपासाची दिशा जाणूनबुजून बदलली जात आहे का, असा गंभीर प्रश्न निर्माण झाला आहे.
31 जानेवारी 2026 रोजी रात्रीच्या सुमारास बांधकामस्थळावरून दोन ट्रॅक्टरभर सळई व लोखंडी रॉड चोरी झाल्याचे स्पष्ट सांगितले जात आहे. या चोरीमुळे अंदाजे 15 ते 16 लाख रुपयांचे नुकसान झाल्याचा दावा स्थानिक पातळीवर केला जात आहे. मात्र पोलिसांच्या अधिकृत नोंदींमध्ये केवळ मर्यादित प्रमाणातील साहित्य आणि अत्यल्प किंमत दाखवण्यात आली आहे. मग उर्वरित लोखंड नेमके कुठे गेले, हा प्रश्न आजही अनुत्तरित आहे.
या प्रकरणात 6 ते 7 जणांचा सहभाग असल्याची चर्चा असूनही, अधिकृत तपासात केवळ 3 आरोपींचीच नावे पुढे आणली जात आहेत. यामुळे तपासात निवडक कारवाई होत असल्याचा संशय व्यक्त केला जात आहे. विशेष म्हणजे सुरुवातीला काही मजुरांना ताब्यात घेण्यात आले होते, मात्र कोणतीही ठोस माहिती न देता त्यांना सोडून देण्यात आले. यामुळे चोरी ही बाहेरील नव्हे तर आतल्या मदतीनेच पार पडली का, असा प्रश्न उपस्थित होत आहे.
तसेच चोरीसाठी वापरण्यात आलेल्या वाहनांबाबतही संभ्रम कायम आहे. प्रत्यक्ष घटनास्थळी दोन ट्रॅक्टरचा वापर झाल्याचे सांगितले जात असताना, अधिकृत कागदोपत्री केवळ एका ट्रॅक्टरचा उल्लेख का आहे, याचे उत्तर अद्याप मिळालेले नाही. यामुळे उर्वरित वाहन व त्यामागील व्यक्ती झाकल्या जात असल्याचा संशय बळावत आहे.
या प्रकरणात सुरुवातीला माजी लोकप्रतिनिधींची नावे चर्चेत होती, मात्र आता ती नावे तपासातून गायब होणे हे देखील अनेक प्रश्न निर्माण करणारे आहे. जर तपास निष्पक्ष असेल, तर कोणतीही नावे लपवण्याची गरज का भासावी, असा सवाल नागरिक विचारत आहेत.
या सर्व बाबी पाहता, स्थानिक पातळीवरील तपासावर विश्वास ठेवणे कठीण झाले आहे. या प्रकरणाची वरिष्ठ स्तरावरून स्वतंत्र, निष्पक्ष व पारदर्शक चौकशी होणे अत्यावश्यक असून, संपूर्ण चोरी गेलेल्या साहित्याचा तपशील, प्रत्यक्ष नुकसान आणि सर्व आरोपी जनतेसमोर यावेत, अशी जोरदार मागणी होत आहे.
जर या प्रकरणात वेळेत सखोल चौकशी झाली नाही, तर सरकारी विकासकामांमधील अशा संघटित चोरीचे प्रकार आणखी वाढण्याची शक्यता नाकारता येत नाही. त्यामुळे संबंधित यंत्रणांनी तात्काळ दखल घेऊन कारवाई करावी, हीच नागरिकांची अपेक्षा आहे.
