कार्यक्रमांच्या नावाखाली वसुली, रक्कम खिशात घातल्याचा आरोप, भटाला पंचायतमध्ये खळबळ

सविस्तर बातमी:-वरोरा पंचायत समिती अंतर्गत येणाऱ्या ग्रामपंचायत भटाला येथील ग्रामविकास अधिकाऱ्यावर ₹15,000 रुपयांची रक्कम अपहार केल्याचा गंभीर आणि खळबळजनक आरोप समोर आला आहे. महाशिवरात्री तसेच इतर सांस्कृतिक कार्यक्रमांच्या नावाखाली गोळा केलेली रक्कम बँकेत जमा न करता संबंधित अधिकाऱ्याने स्वतःच्या वापरासाठी ठेवल्याचा आरोप करण्यात आला आहे. या प्रकारामुळे संपूर्ण गावात तीव्र संताप व्यक्त केला जात आहे.

ग्रामपंचायत सूत्रांच्या माहितीनुसार, कार्यक्रमांसाठी ठराव मंजूर करून रक्कम वसूल करण्यात आली होती आणि त्याची अधिकृत पावतीही देण्यात आली होती. मात्र अनेक महिने उलटूनही ही रक्कम शासकीय खात्यात जमा करण्यात आलेली नाही. पंचायत प्रतिनिधींच्या मते, हा प्रकार म्हणजे सरळसरळ शासकीय निधीची लूट असून कायद्याला खुलेआम आव्हान देण्यासारखा गंभीर प्रकार आहे.

सरपंच, उपसरपंच तसेच ग्रामपंचायत सदस्यांनी पोलिसांकडे तत्काळ गुन्हा दाखल करण्याची मागणी करत संबंधित अधिकाऱ्यावर भारतीय दंड संहितेच्या कलम 409 (शासकीय सेवकाकडून गुन्हेगारी विश्वासघात), कलम 420 (फसवणूक), कलम 467, 468, 471 (बनावट कागदपत्रे व नोंदींमध्ये फेरफार) तसेच भ्रष्टाचार प्रतिबंधक कायदा 1988 च्या कलम 13(1)(a) व 13(2) अंतर्गत कारवाई करण्याची मागणी केली आहे.

पंचायत प्रतिनिधींच्या म्हणण्यानुसार, या कलमान्वये दोष सिद्ध झाल्यास संबंधित अधिकाऱ्याला 7 ते 10 वर्षांपर्यंत कठोर कारावास आणि मोठा दंड होऊ शकतो.

ग्रामीणांचा आरोप आहे की संबंधित अधिकारी यापूर्वीही मनमानी वर्तन करत असून बैठकींना गैरहजर राहतो आणि नागरिकांची कामे जाणीवपूर्वक रखडवतो. त्यामुळे गावात असा समज निर्माण झाला आहे की त्या अधिकाऱ्याला कायद्याची भीती उरलेली नाही आणि त्यामुळेच खुलेआम दादागिरी सुरू आहे.

पंचायत पदाधिकाऱ्यांनी स्पष्ट इशारा दिला आहे की, जर लवकरात लवकर पोलिस व प्रशासनाने कठोर पावले उचलली नाहीत, तर हे संपूर्ण प्रकरण नागपूर स्तरावर नेऊन उच्चस्तरीय चौकशी आणि कारवाईची मागणी केली जाईल.

आता प्रशासन भ्रष्टाचाराविरोधात झिरो टॉलरन्स दाखवते की नाही, याकडे सर्वांचे लक्ष लागले आहे.